600狗狗主人留倩影 創最大相冊健力士

狗狗唔單止係人類最好嘅朋友，仲係我哋最親密嘅「家人」，好多主人更加會帶埋狗仔去旅行，分享難忘又難得嘅「歎世界」時光。噚日領展赤柱廣場就特登齊集咗超過600個愛犬家同佢哋嘅狗狗，一齊用珍貴嘅旅行照片，整咗本5米寬x6米長、創下健力士世界紀錄嘅全球「最大相冊」﹗令愛犬都可以喺歷史上留名，夠晒威威。

憑住「伊豆高原5日4夜遊」攞到最精采狗狗旅遊行程嘅狗主Raymond，仲同大家分享去旅行點可以人狗盡興。黛安睇番個行程，唔止包括「人狗共浴」嘅室外溫泉，仲有可以「四隻腳」同「兩隻腳」一齊浸嘅足湯，連去坐遊覽船、玩高卡車、整陶瓷同參拜神社都可「汪汪同行」，難怪大會都讚夠晒「狗狗friendly」。贏咗價值超過6.2萬「雙人連狗狗」沖繩5日4夜的旅遊套票嘅Raymond仲話，原來自己從未同狗狗出過國，今次可借機圓夢啦。