太古私人會所Refinery 歎米芝蓮級精緻粵菜

黛安經常都好羨慕喺太古坊返工嘅朋友，事關嗰度設施配套真係好完善，既有藝術文化場地ArtisTree、共用工作空間Blueprint，仲有個一流嘅貴賓宴客場所。黛安所講嘅係今年初完成裝修、前身為Butterfield's嘅私人會所The Refinery。上星期黛安就應太古地產嘅公關姊妹邀約試菜，至今仍然齒頰留香。

聽太古地產市場推廣總監Babby（馮小玲）及公共事務總經理May（林珩）介紹，食物咁有水準，皆因餐館找來曾帶領國金軒摘取米芝蓮二星殊榮嘅陳國樑師傅掌舵。當日試嘅菜式不乏佢嘅得獎名菜；其中黛安最深刻嘅要數「崧子松露大良鮮奶」，蛋白鮮奶炒得又嫩又滑，配上濃郁撲鼻的松露香，口感味覺皆頂級。

陳師傅笑謂，煮嘅時候兩隻手都唔得閒︰左手要不停轉動個鍋，右手要密密炒；火喉亦講究，太大火蛋就會變嚡口，太細火則水稀稀難以成形，所以好考功夫。

其餘菜式由點心到滋補潤肺嘅杏汁豬肺湯、賣相一絕且食到啖啖鮮香的蘆筍海皇脆麵等，全部都好出色，黛安都食唔停口。難怪席上嘅公關姊妹笑謂，經常帶賓客來食飯，不知不覺間增磅唔少，夏日要積極減磅了！