海港城打造「大球場」 玩轉巨型彈彈波

唔少人細個時都玩過彈彈波，黛安收到風，海港城聯同美國著名空間設計團隊SNARKITECTURE，會舉行互動藝術裝置企劃—「BOUNCE」，大家喺今個星期五（10日）開始，至下個月2日，喺海港城海運大廈露天廣場外嘅純白「大球場」，就可免費參加巨型彈彈波「球賽」，盡情打卡、自拍。同時「海港城‧美術館」亦會有巨型波波陣裝置藝術作品展出。黛安都要約埋好姊妹一齊去回味下充滿童年回憶嘅彈彈波。

公關姊妹仲話，設計團隊SNARKITECTURE係將兒時嘅彈彈波放大300倍，再配合白色鋼框架組成嘅龍門陣，將維港旁化身為一個超現實嘅純白「大球場」，大家可以喺一個獨特構建嘅空間內，自由滾動同投擲巨型白色充氣彈彈波，諗起都覺得好玩啦！

海港城高級經理楊浩章又講，唔擔心今次活動會被嘅大批街頭表演者影響，亦唔會投訴表演者，因相信政府會處理有關投訴同問題。