全球首創 巧用科技 結合傳統 沖奶茶機械人

港式奶茶製作技藝屬香港非物質文化遺產之一，今日去會展舉辦嘅國際茶展，就可以一睹全球首部智能沖港式奶茶機械人「金仔KamChAI」喇！

黛安同牽頭研發機械人嘅香港咖啡紅茶協會主席黃家和（Simon）傾開，原來一年多前佢已有呢個構思，於是就同香港生產力促進局合作，斥資逾百萬以半年時間打造「金仔KamChAI」。

Simon話，機械人已輸入過去多位金茶王師傅沖茶嘅心得作為大數據，包括時間控制及分量調配等，雙手可靈活模仿真人沖茶嘅動作，未來機械人會再度改良，希望可做到溝通同行走。佢仲話，而家茶餐廳鬧「人才荒」，搵個識沖奶茶嘅師傅非常難，結合傳統及人工智能嘅機械人日後有助減輕人手壓力。

今日喺國際茶展會舉行《國際金茶王大賽2018（港式奶茶）—十周年盃》香港區總決賽，誕生嘅港區金茶王會喺本周六（18日）同加拿大、澳洲、上海及深圳等6個地區誕生嘅茶王，競逐金茶王寶座。黛安到時一定要擔定凳仔睇啦。

另外，HKT旗下Tap & Go拍住賞由即日至下周二（20日），喺會展美食博覽推出Virtual Store，推出「$1 Go」限時快閃搶購，包括鴨肝配以朱朗松白酒汁（190克）及法國皇御蠔（10隻）等，市民只需在指定參展商或Virtual Store以Tap & Go拍住賞付款，累積消費滿$500，便可享$60 Tap & Go拍住賞儲值額回贈。