去「LUMI」試菜遇Martin 向陳南祿偷師學時間管理

黛安前日睇《晴報》，見美心同熊谷師傅合作嘅「無國界」料理餐廳「LUMI」開張，即刻去試下，點知撞到美心中菜及m.a.x. concepts COO李文賢（Martin）同恒隆地產董事長顧問及非執行董事陳南祿（Philip）。

黛安一直視Philip為偶像，皆因佢仲做緊國泰航空常務總裁嘅時候，01年美國發生「911事件」，航空業大受打擊，02年佢就度蹺送1萬張來回機票，成為全球盛事。而喺03年SARS之後，市民擔心搭飛機會染病，佢就推出「同心為香港」行動，鼓勵市民消費換機票，令處於低谷嘅航空客運市場重現生氣，難怪大家都叫佢做「蹺王」！不過，人生總有高山低谷，Philip曾經患癌，身體一度出現警號，不過佢都一一克服，時時笑面迎人，充滿正能量。

Philip係愛馬之人，做過國泰又做地產，佢以前兩隻馬叫「有機可乘」同「時時有機」，明顯和應飛機生意；轉了做地產，隻馬就叫「天地同心」，完全表明心迹。他興趣多，退咗休之後仲忙，和太太去日本住了一個月，跟住去中亞旅行。現時佢仲係恒隆嘅董事長顧問及非執行董事，明年9月新學期仲教MBA，但他已經寫好咗幾萬字教材，連第一堂叫學生做咩都已經諗好，黛安真係要向佢學習時間管理。

而Martin就係運動健將，之前更參加三項鐵人賽，認真厲害。而剛好太古地產嘅太古廣場總經理Theresa亦都喺LUMI吃飯，之前吸引好多人去打卡嘅「鏡與花藝術裝置」就係佢負責。大家咁有緣分，梗係要同佢地影相留念啦。

講番「LUMI」，親身去日本試菜嘅Martin話，依家Menu有30款特色菜，嚟緊會再加。主廚關師傅話，因要過Martin嗰關，做到同日本嘅味道一樣，會不斷鞭策自己和團隊，所以話成功沒僥倖。