點解唔請我開party？

近年我戒掉在大班朋友約會中，多口問些以為理所當然的事︰

我（一臉雀躍地）︰「喂！A小姐下星期搞party，你去唔去呀？」B小姐（一臉愕然，再臉色一沉）︰「無喎，佢都無叫我去！」我（一臉尷尬）︰「啊…呀…A小姐呢排比較忙，可能未約到你啫！拜拜！」

在這𤓓爆的氣氛中，我0.1秒完結對話。其實同樣而調轉角色的情況，我都遇過。以我與某人的交情，其他人以為對方一定邀請我去吃飯、唱K、派對等，但我也試過落空。除了回答「無請我喎」之外，我也不知道該說甚麼。

我承認我並非凡事都看得開，當你看社交網站見到大班朋友聚會，竟然沒有叫我去，又或是某人結婚廣發請帖而沒有自己份兒時，於我心也會戚戚然。除了安慰自己「仲好，慳番份人情／飯錢」，心內總會渴望獲邀。寧可別人請我，我沒有空赴會，也不願被遺漏。這個時候你會如何自處？

我有些朋友非常進取，當知道自己不獲邀，會「兜口兜面」向對方問個究竟︰「點解？點解唔請我飲呀？你唔記得咗我啦？」此時，主人家要被迫臨時作個得體的藉口︰「啊…呀…因為場地太細，阿爸阿媽又請埋啲三姑六婆，搞到我無位請你。遲啲請你食番餐補數！」但大家都知道，所謂補數的一餐飯，只不過是寒暄說話。

友情是雙向的，也現實地有層級之分。你以為和別人要好，但別人未必視你為好友。以前我不被邀請，也會試探對方，曾經一次，只是一次單刀直入問：「點解？點解？點解？」但想深層，𢱑爛塊面問對方，你會知道真正答案嗎？只會令大家尷尬，僅餘的友情再打折扣。「面係人哋畀，架係自己丟」，無謂做得那麼肉酸吧。

友情是累積的，對方沒有視你為好友，中間總是有一些狀況。如果你珍惜這段友誼，不妨多了解有何不妥，再慢慢做點「儲蓄」，多點關懷，多點問候，把大家的關係昇華。否則，平日對人置若罔聞，欠缺關懷，無心經營，到最後再多的「點解？點解？點解？」也是徒然。

（本欄逢周一刊登）