屍殺任何仁

一星期前

日本賣座電影《屍殺片場》睇到我真的在戲院裏拍晒手掌呀！看片名和海報可能以為又是屍殺列車的喪屍片類型，卻原來是有笑有血有淚有熱情的好戲……電影一直以開場的「37分鐘一鏡到底」作賣點，也只能如此，因為再講多些就會劇透。只是啊，這37分鐘的劇情和拍法實在爛到不能再爛，有觀眾捱唔住憤而離場，我也大叫：「唔係啩！」好想割凳！幸好忍了忍，堅持留低睇你有幾好睇，最後恍然大悟，笑到標淚，原來爛得有理，這37分鐘真的好重要好有意義，尤其是我們做廣告和製作的，明白箇中的艱難和苦樂，特別有共鳴。打算再買飛入場，就是為了重溫這爛爆了的37分鐘！

三天前

《屍殺片場》之後，想到了消防處藍色緊身「任何仁」。無論你鞭撻佢幾「Bad taste」幾「爛」都好，都應該睇下當中的落力和認真。（http://m.youtube.com/watch?v=P9mWj-QMc10）羅蘭姐版本，開鏡的標題設計用心地營造了港產靈異片風格，外賣仔衫上都仔細地玩嘢印有「消記茶餐廳」，而精心寫出來的歌詞配合舞蹈都排過下㗎，「左手右手直手擺喺心口」。此外，又多角度拍了萃雯BB和曹星如版本，以澄清一些市民對「亂救人」的疑慮，都算考慮周全啊。

Taste呢樣嘢，已經在香港消失了好耐，不要講到好似是任何仁的錯，很多唧都唔笑，又唔知想講乜的所謂網絡廣告片，已經氾濫了很久；即使搵了名人／歌星／KOL拍攝，身光頸靚又如何？對白和劇情仍是低俗無聊，若斗膽批評一下，就會招來一句「你old school」駁斥，Viral嘛，社交網絡平台係咁玩啦！很多創作人和客戶都有如此謬思，不顧品牌，遑論品味，此風又不是今天才起，只是因為今次是消防處喎，政府廣告宣傳片喎，竟然玩呢啲兼玩到咁盡，才會引起咁大反應……老老實實，我覺得起碼任何仁都幾好笑，又幾入腦易記，信息又清晰。

（本欄逢周二刊登）