陳淑蘭
陳淑蘭

女人50要開開心心

發佈時間: 2018/12/13

女人50要開開心心

TVB台慶節目《女人40》,由田蕊妮擔任主持。雖然我已年過40,但依然睇得投入,因為田蕊妮主持得實在好。

之前張艾嘉執導過一部《20、30、40》的電影,時代不同,人亦更長壽,不知會否有人執導一部叫《40、50、60》的電影呢?很多50歲的女人,仔大女大,毋須再投放太多時間去照顧家人,可以開始再為自己的人生重新出發,亦可增添很多故事題材。

其實從47至50多歲的女性,差不多已踏入更年期,身心也開始要經歷一些難關了。對我來說,外來挑戰就是身邊那些30歲以下的朋友,常拿我的年紀來打擊我。但我絕對不會被擊倒,因為這些人已經被滅口了!哈哈哈!

其實我覺得年紀只是一個數字,最緊要是心理關口。你覺得自己老,就會樣樣都變得衰老,那何不做個老天真,開開心心過人生呢?

一、女人50,一定要有可以同你去旅行、飲酒談心的閨密。她們分分鐘同你一齊共度餘生,一齊腦退化地講心事,一齊坐住輪椅陪伴終老。(女人比男人長命,他們未必能陪伴到尾。)

二、女人50,除了保養外表之外,還要培養一個自己可以堅持或喜歡的運動。外表呃到人,身體最誠實。我入五,腰骨第一時間發出大警告,每朝起身,骨頭都好似給人打過那麼痛,所以我會立定決心去學泰拳!

三、女人50,依然記得要多睇書、睇世界、睇埋樓都無問題;年輕時候睇唔通中外名著,可能這時候你再讀已可以睇通睇透。可以的話,去上學,結識年輕的同學,自己的心境都會散發多些陽光能量,令自己時刻有豁然開朗的感覺。

無論你是20、30、40,還是50、60、70,自己開心自然有信心,就算給人笑是耆英,都是快樂的耆英,so what?

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭