林鄭羊腩煲蛇羹打動仙姐 戲曲中心開幕演《再世紅梅記》

萬眾期待嘅西九文化區戲曲中心前晚正式開幕，黛安有幸獲邀欣賞開幕劇目︰《再世紅梅記》，而且仲由粵劇名伶白雪仙（仙姐）親自監督。特首林鄭月娥致辭時就話當年任政務司司長，兼任西九文化區管理局董事局前主席時，已考慮到用咩做開幕劇目，佢第一時間諗起仙姐，所以能夠邀請到仙姐做開幕劇藝術總監，佢都有啲「功勞」。

林太笑指，特意透過前立法會議員劉千石，邀請仙姐到官邸晚宴，佢打聽到仙姐最愛羊腩煲同蛇羹，所以特意準備，希望「雞髀打人牙骹軟」，但仙姐喺台上就擰晒頭。林太補充話，仙姐對徒弟同演出要求好高，當晚無即時答應，但仙姐喺台上又再擰頭。

中場休息時，黛安就問石哥（劉千石），有無食過飯同仙姐點解在台上擰頭啊。石哥記得林太在2015年11月約咗仙姐吃飯，內容全部正確，只係仙姐耳朵唔係咁好，助聽器戴咗喺右邊，而林太啱啱企喺佢左邊，所以仙姐聽得唔清楚才擰頭。

原來仙姐揀《再世紅梅記》做開幕劇目，背後係有原因：今年適逢仙鳳鳴劇團《再世紅梅記》劇目面世一個甲子，又係編劇唐滌生逝世60年，亦係任劍輝（任姐）逝世30周年，所以演出以作紀念，有代表粵劇薪火相傳嘅意思。

《再世紅梅記》全劇長4小時，全晚演出精采絕倫，真係要佩服72歲的陳寶珠丶77歲的梅雪詩和85歲的尤聲普，4個鐘又唱又做，使盡渾身解數，真係經典演出。落幕時屏幕上打出幾張任劍輝與白雪仙演出的黑白相片，正是60年前此劇首演嘅照片，今次係對前輩致敬。

全劇演員和西九主席唐英年謝幕後、仙姐由陳寶珠和梅雪詩扶住，再向觀眾揮手致意兼多謝，場面令人感動。