星光大道小食亭 「朝桁晚拆」打造港產特色

尖沙咀星光大道重開後，農曆新年吸引咗唔少旅客同市民去參觀，黛安知道星光大道沿路有7部流動銷售車同1間小食亭，而小食亭就用咗「朝桁晚拆」設計，在開檔或收檔時會自動上下開合，聽檔主美樂士多負責人Patrick講，平常有途人特意問營業時間，希望捕捉檔攤開合瞬間。

咁獨特嘅設計，原來係出自本地建築及藝術團隊LAAB手筆。在美國麻省理工修讀建築碩士嘅設計總監吳鎮麟（Otto）話，以前住過港、九、新界唔同地方，見到香港排檔最大特色就係「朝桁晚拆」，決定重新將呢啲特色融入設計中，運用油壓臂等機械裝置重演本土特色。

Otto解釋，第一套機動系統主力負責排檔嘅開合步驟，由49枝油壓臂組成，由摩打推動起合，整個過程大概需時2分鐘；第二套系統就由摩打同齒輪組成，營業時，頂部嘅木條會好似海浪咁擺動。

至於其他銷售車，Otto希望拉近自然建築與人嘅距離，所以用木條搭建，同時保留「朝桁晚拆」嘅車仔檔形式，車仔檔頂部仲設有太陽能板，令商家可做到自給自足，認真環保！新世界發展執行副主席兼總經理鄭志剛一直好支持本地創意和科技發展，今次佢哋同LAAB合作，就畀設計師大膽創新咁設計。聽Otto講，嚟緊會將作品報名參加各項大賽，佢哋嘅作品咁獨特，一定會攞到好成績！