節日後急救

「終於可以見下朋友！」Mandy整個新年幾乎沒休息，年三十帶着行李箱上班，放工後直奔車站，趕回鄉吃年夜飯，初一至初十馬不停蹄拜年，況且，今年她第一次帶着孩子回鄉，可以想像她這個假期有多忙。

「拜年辛苦都預咗，我最頂唔順嘅係，奶奶喺親戚面前變咗第二個人！」Mandy素來與她奶奶相處不錯，甚少有婆媳糾紛，沒想過首次同赴內地卻出現摩擦。

「佢喺親戚面前擺晒奶奶款，直頭好似睇戲咁，打麻將要我斟茶遞水，成班親戚食飽飯要洗碗就話『等我新抱嚟』，其實我睇住個女已經好唔得閒……」類似情況，我也試過，長輩純粹想人知自己有個乖新抱，未必有意識想使喚他人。

「你老公呢？」「佢成日同啲親戚出去玩，留低我同阿囡喺屋企。我同佢呻，佢話奶奶要面子，想喺班親戚面前威，叫我就佢幾日，但自己完全無諗過幫手！」我們安慰她，最辛苦的都已捱過，叫她不要再想。

大時大節過後，報章雜誌都會出現一系列廣告，以「節日後急救」作招徠，但大家有沒有想過，節日後最需要急救的，不是肌膚，不是體重，而是家庭關係？尤其農曆新年，堪稱「家庭地雷陣」。以Mandy的個案為例，年假後，與奶奶的相處出現裂縫，而丈夫自己走去玩、沒對妻子加以協助，亦為夫妻關係埋下炸藥。

此外，有時親戚問長問短、利市畀多畀少、期假太過放縱子女等，都可以是「地雷」，有機會成為爭執的導火綫，若不加以處理，小心炸藥隨時引爆。

（本欄逢周一刊登）