電動方程式周日開賽 電競館體驗風馳電掣

2019香港電訊香港電動方程式大賽，呢個星期日（10日）就開賽啦。除咗留喺看台為選手打氣，仲可以去Allianz E-Village嘅體驗區，體會賽車手風馳電掣嘅興奮。今年Allianz E-Village規模更大，除咗有街道電動賽車嘅資訊，仲可近距離接觸充滿未來感嘅第二代戰車，同喺電競館玩全球首個集互動賽車、遊戲同觀賞體驗於一身嘅「Ghost Racing」，實時喺真實比賽中同頂尖賽車手較量，非常刺激。兒童專區都有特別嘅電動方程式障礙賽舉辦，保證大小車迷都「揸得開心」。

想玩得盡情，記住周日早上7點到下午6點入場。大會仲好鼓勵大家環保啲，場內喜力啤酒膠杯會回收重用，亦會提供免費便攜水袋，方便大家去Allianz水站「充水」。