台插畫家「吃貨雞仔」 復活節現身千色匯

嚟緊4月就到復活節假期喇，想善用呢個難得嘅假期，不妨去啲有趣又有意義嘅活動。黛安知道，由今個月尾開始，唔少商場就會開始復活節活動推廣，內容好多亦集娛樂、藝術同教育於一身，啱晒大人細路參與！

其中荃灣千色匯、元朗千色匯同K Plus由3月29日至4月28日期間，會將上海蛋藝設計達人施申炳老師，同台灣人氣90後女插畫家「吃貨雞仔」兩地兩代藝術作品首次帶到香港，呈獻「吃貨雞仔滋味遊藝團」，展出好似施老師獨創以蛋殼做材料嘅藝術品，整成不一樣嘅「復活蛋」，以及台灣插畫家洪宇晴筆下嘅「吃貨雞仔」主題裝置等，商場即時充滿藝術氣氛。

至於新都城中心2期亦會喺3月30日至4月28日期間，將商場打造成全港最大型嘅STEAM科學基地，融合玩樂同教育，帶來多種刺激有趣嘅STEAM體驗，好似利用咗數學原理計算折射面嘅幻變彩蛋隧道、解構各類液體材料嘅濃度同密度嘅百變實驗室等，齊齊進入奇秒科學世界，啱晒帶小朋友嚟玩住學。