發掘不同韓風作品 海港城與你「拉闊藝術」

海港城成日都展出好多唔同類型嘅藝術品，所以黛安每次行過都好期待，噚日就喺露天廣場見到好多色彩繽紛嘅動物雕塑，即刻要打卡分享。公關姊妹同黛安講，海港城舉行緊「拉闊藝術」@海港城公共藝術展覽至下月3日，會喺商場內展出3位韓國實力派藝術家嘅作品，除咗露天廣場外，港威商場展覽大堂II、同埋海洋中心「海港城‧美術館」都可以睇到佢哋嘅作品。

黛安知道，呢3位韓國藝術家分別係張世一、李成玉同Henn Kim，佢哋都係首次喺香港舉行個人展覽。露天廣場展出嘅係張世一嘅作品，將動物圓滑嘅綫條磨掉，改用直綫同幾何創作一隻隻稜角分明嘅動物雕塑，再配合鮮艷嘅顏色，好似去咗另一個世界咁！

港威商場展覽大堂II就係李成玉嘅展覽，佢用不鏽鋼創作咗一系列懸垂嘅昆蟲作品，寓意寄望大自然能夠堅強咁抵禦人類嘅破壞，而「海港城‧美術館」就舉行Henn Kim展覽，佢以單色漫畫勾畫出唔同嘅場景，非常特別！

海港城仲會喺本月29日至4月1日期間，喺馬哥孛羅香港酒店舉辦Harbour Art Fair 2019，將超過50間酒店房間轉化成現代藝術展場，展示嚟自亞洲同全球嘅頂尖畫廊當代藝術作品，包括攝影、繪畫、雕塑同陶瓷等。