有溫泉泳池 鄰近國際通 東瀛遊沖繩那霸開酒店

去旅行一向係香港人生活嘅頭號使命，黛安噚日同東瀛遊執行董事禤國全傾開，知道佢哋繼大阪之後，東瀛遊已經同沖繩當地嘅承建商簽咗約2.63億港元合約，喺那霸市牧志興建12層新酒店。

聽禤生講，因為近年旅行社業務增長轉慢，所以想開拓新板塊帶動更多利潤，加上那霸機場第二跑道即將喺明年啟用，佢睇準未來一定會有更多旅客去沖繩旅遊，對酒店嘅需求亦會提高，「日本酒店入住率一向好好，供求好緊張，依家目標係明年9月底落成，並喺第四季開始營業，如果首年能有8成入住率都好滿意。」

禤生又同黛安講，新酒店地點夠晒方便，喺那霸機場坐單軌列車去牧志只係16分鐘，費用僅300日圓（約21蚊港紙），而且離沖繩最旺嘅「國際通」超近，只需行約兩分鐘，「依家仲同Toyota傾緊，直接喺酒店度開個租車站，方便旅客自駕遊。」禤生仲話，酒店會有溫泉同泳池，為方便家庭客，溫泉仲可以男女共浴，只要着件泳衣落水，就可以一家大細「邊浸邊傾」啦。

加碼升級榴槤旅行團

除咗去日本，有口福都好重要。東瀛遊啱啱都公布咗廣受好評嘅「榴槤主題旅行團」今年再度加碼升級，除咗會去馬來西亞老字號果檔「即開即食」放題，包括可以食到「果王之王」貓山王、雙冠軍黑刺及2018年榴槤冠軍「紅蝦」等最少6個時令品種外，仲可以食到一系列榴槤主題美食，同去埋榴槤主題館同檳城故事館，邊食邊了解檳城文化。