判斷業績不能只看表面

朋友Chole近期失戀，據講係發現咗前男友並非如表面所見風光，背後竟然是月月清嘅月光族，兼且孭住唔少卡數，更頻頻向Chole借錢還債，最終Chole頂唔順而斬纜收場。曉陽不是感情達人，不知如何安慰，只能講睇人不能只睇表面，內涵同樣重要。

睇股票同睇人一樣，最緊要唔好睇表面。就好似業績咁，千萬不能因為盈利數字表面升跌就判斷其業績好與壞。例如小米（01810）周二公布去年業績，全年扭虧為盈，稅前利潤137.27億元（人民幣，下同），經調整利潤85.55億元，按年增59.5%。唔使蝕錢，仲要賺咁多，何解昨日股價要跌4.6%？

魔鬼在細節，去年硬件綜合稅後淨利率少於1%，而且被視為公司賺錢能力最高的互聯網服務業務，上季收入按季跌14.6%，是有公布以來首次下跌，再加上單計去年第四季的收入，更是按年跌13%。凡此種種，都令投資者有戒心，覺得即使整體有錢賺，都未必能長遠維持。

而且，錢是賺了，但不派息就令股東覺得未能分享盈利，結果就是出現業績表面看雖好、但股價不升反跌的結局。

（本欄逢周四刊登）