深圳一日遊

香港地少人多，不少人周末時都寧願靜待家中，但身為打工一族，偶爾都需要一些娛樂去平衡生活。最近喜歡約同三五知己，周末到深圳一日遊。有人會話︰「使乜去深圳呀！咁污糟！海底撈、喜茶……香港都有啦！」曾幾何時，我都有這種偏見，但上星期到過深圳後便完全改觀了！首先是當地電子支付的廣泛應用，不論是乘搭地下鐵、的士，抑或到食肆用餐、小店購物，都接受微信、支付寶支付，因此到深圳前已毋須兌換人民幣，只要有電子錢包就能暢通無阻，非常方便！

深圳一日遊的重頭戲當然是「食」，深圳美食多，價錢比香港便宜，自然食得開懷。不少餐廳都可讓食客提前於微信「攞籌」，如抵達餐廳後已過了你的籌號，亦不會作廢，只要多等三張枱便可入座。點餐、結帳都毋須餐廳職員協助，只要掃一掃桌上的二維碼，便可於微信上瀏覽菜單（圖文並茂），用餐完畢再掃一掃二維碼，便可結帳走人了！

可能是深圳地大，感覺上無香港那麼擠擁，同時離開香港遊玩，心情格外愉快，因此即使尖沙咀即將開第四間喜茶，我都不會放棄上深圳！

（本欄逢周一刊登）