香港仲有無得醫？

三星期前

70歲的黃阿媽家居意外仆低，斷了大髀骨，一隻眼腫黑瘀青，白車五分鐘抵達現場救護，急送觀塘聯合醫院。第一天已照齊X Ray，隔日做妥手術，再由九樓骨科轉到康復病房，進度非常好，住了兩個星期出院，更有護士上門兩次跟進。黃阿媽唞順條氣，即聲如洪鐘，見人就大讚一眾男女小鮮肉醫護人員，有心又細心。

「嘩，個男護士真係好耐性。」黃阿媽好似發現外星生物咁︰「有個阿婆傷口痛，情緒差，不肯進食，阿男護士竟然一直好言相氹餵飯，真難得呀。」由於是半麻醉手術，現場聲音必將清醒可聽，黃阿媽本來嚇到口震，那知道出來後笑口大開︰「阿姑娘年輕又溫柔，在手術室一直坐在我身邊，握住我隻手，讚我皮膚嫩滑，又話我個樣唔似真實年齡……開心晒，分散了我的注意力。」

在忙到九彩、兵荒馬亂的環境下，這些醫護人員仍然咁專業又有heart，令人尊敬又感動。平日隔住份報紙或電腦芒睇新聞，知道醫生護士日夜處於高壓狀態，長期人手不足、床位欠缺，遇上流感高峰期更加恐怖；呢一排親臨其境，才真正感受到事關重要，是民生福祉，是水深火熱。

我只是深近視的小市民，看不透「明日大愚」這些接二連三的基建遠景，只見到今日逼近眼前的真正需要，請不要abuse用心盡力的前綫醫護人員。https://youtu.be/Vgiu7aWVLnE

3小時前

如果我是醫生，寧願留在公立醫院捱更抵夜，抑或身光頸靚出去掛牌執業？

只要一心為了病人着想，點做都是好事，不敢奢望全是仁醫，但基本的醫德還是要守住。我可能都會選擇在公院忙到飛起，有咁多隊友同病人，咁多奇難雜症同happenings，救到更多人又不會悶親，幾好。最怕由早到晚坐在間房，一個病人接一個，靜幽幽，非常dull。

如此離譜離地思維，只怪睇了太多日劇《緊急救命Code Blue》、韓劇《浪漫醫生金師傅》。

（本欄逢周二刊登）