海洋公園免費教材 推動環保教育增知識

小朋友係社會嘅未來棟樑，要令佢哋學識保護環境，當然要由細開始培育。聽公關姊妹講，海洋公園最近聯同公園保育基金和現代教育研究社，推出咗一套以自然保育為主題嘅《威威與好友》幼稚園保育教材，可以畀本地幼稚園申請索取免費紙本版教材，等小朋友透過海洋公園吉祥物，同多個動物好友嘅大自然探索歷險故事，了解到海洋污染、全球氣候變化等問題，好有意義啊！

海洋公園教育及探索高級經理張芝中同黛安分享，而家唔少學生嘅保育意識都好好，例如拒食魚翅、處理垃圾又識得分類回收等，但就未必完全知道背後原因，所以希望透過教材，等小朋友了解更多環保措施背後嘅因由，同鼓勵佢哋多啲認識唔同動物和生物。教材至今已向392間學校免費派發，已有4.6萬人受惠喇！

有參與計劃嘅香港仔聖伯多祿天主教小學、課程發展主任關寶華話，希望藉今次合作係校內推動環保教育，甚至透過日常生活將環保知識帶返屋企，所以絕對唔止課堂學習咁簡單！