買定唔買？還得到先好買

上星期講到同事Mabel覺得內房股上落波幅大兼息口不俗，啱晒短炒之餘，又可收息保本。

聽落好似有道理，但細心諗下，世間邊有咁便宜嘅事？如果內房賺息又賺價，豈非人人爭住買？

曉陽先對Mabel強調，買股票不應只抱住炒上落波幅嘅心態，萬一這個浪不是上而是落，買錯邊豈不是連本都無？因此投資先要有個好心態，不要覺得賺波幅才是投資成功。

至於內房值不值得買，上期已經講過，曉陽並不推介。每個行業嘅結構都不用，內房屬於資金密集行業，因此要長期保持龐大的資金去發展同營運。而資金來源不外乎兩樣，收入和借貸。由於房地產發展周期長，因此投資後要賣樓才可回本，收入進帳速度慢，所以房企的經營資金亦需來自銀行貸款，負債比率一般較其他企業高。

公司需要周轉和運作，有債務不足為奇，最重要是能準時還款、沒有違約。還幸暫時上市的大型內房都未聽聞有債務違約的問題，不過經常都報道指內地小型房企周轉不靈而倒閉。資金出問題，一來是負債纏身，二來是銷售面臨困難，畢竟內地私樓供大於求，銷情欠佳分分鐘就成為無錢回籠的主因，最終錢收不到，又點還債？所以買內房要留意其負債情況，還到債而有錢剩的，才值得考慮。

（本欄逢周四刊登）