選擇死忍，都係死梗

3小時前

覺悟早，生活更美好。

在大坑的Second Draft跟廣告創作大哥T歎着冰凍啤酒吹吹水，他多年前已經從4A國際廣告公司跳了出來開公司，生意做得不錯。「客戶無錢無時間，有交情都算了；無heart無常識的，有筆直又都算了。」T果然EQ高，彈性大啊！「但若遇上無品無禮貌的客戶，超越正常人類情商極限，咁就完全無必要去招呼喇。」

自己生意自己話事，賺少咗，咪再努力過咯！但大公司的打工仔，不管你是高高層還是一粒塵，必須死忍，否則死梗！C做了某廣告公司多年，成績表算是見得人，那知客戶新官上任，一開始就對C極harsh極無禮，處處留難。C的老闆英明果斷，立即炒C去「馬」，以為可以獻媚please客，結果這客戶還是𠴕嘴決絕離去。原來呢，就算你對下屬殘忍，對客戶死忍，到頭來都係死梗。

萬一咁不幸撞上無家教的客戶兼無承擔的老闆，橫死掂死，不如死得好好睇睇，Keep Calm and Drink Good Wine……含笑離場算了。

4天前

廣告人R提起激氣事，說自己開會時一邊present，客戶一邊頭耷耷只望住個電腦，不懂得尊重為何物（下刪三千字）。這令我想起上世紀遇過的一個大品牌客戶，開會時一字排開也是如此表現，行內馳名。我卻沒有很激心，只蔚為奇觀，別人失禮，我失笑。

現在很多廣告公司一樣有如此開會奇景，一邊望住電腦扮忙，一邊偶爾抬頭扮開會的大有人在。由於我份人開始變得有同理心，明白道這其實不關乎「尊重」，而是關乎「膽怯」。這些人只是以「好忙」、「一心幾用中」去掩飾自己零睇法零input，免死金牌是「我趕住覆客戶email，你哋傾住先」。如是者掩人耳目，contribution似有還無。

我明，我真的明，但下次唔該你出返去先。

（本欄逢周二刊登）