中美各有所求 終有協議 羅康瑞︰港樓價難大調整

即將喺本月底卸任貿易發展局主席嘅羅康瑞（Vincent），噚日舉行「告別宴」，邀請傳媒行家聚一聚。雖然年屆71，但Vincent仍然容光煥發，無論身形同樣貌都keep得好後生。佢大談中美貿易戰同對中港兩地經濟嘅睇法。佢又同黛安講，雖然美國總統特朗普係「神經刀」，貿易戰有啲反覆，但中美雙方會「傾得成」，事關各有所求。

籲大家每日運動 注重健康

但佢亦強調，中美亂局會令環球經濟來個大調整，有機會「向下插」；據佢所知，長三角嘅港商已部署轉型，部分已將裝配搬離；雖然有短期影響，但作為瑞安集團主席，佢相信本港樓價唔會大跌，因長遠房屋仍供不應求，加上香港仍有可發展嘅優勢，大灣區係「出路」，而一帶一路東盟國家亦發展得好好，等緊香港嘅資金走出去。至於最近大家最關心嘅逃犯條例修訂，佢就話，商界除咗憂慮追溯期問題，仲擔心會嚇怕內地資金唔敢嚟香港投資。

提到卸任後大計，Vincent話希望快啲享受退休生活。本身係詠春高手、師承葉問入室弟子何金銘嘅Vincent，仲勸大家注重健康，尤其唔少低頭族，最好學習下「練功十八法」，佢當年練咗6個月，就醫好頸椎問題，又教大家上網跟上海市練功十八法協會會長莊元明學幾招，每日5分鐘就可強身健體。