到韓國美容大翻新

上星期，女朋友去韓國同研發護膚的教授和其他做美容的代理開會，我一於跟埋去八卦下有甚麼最新扮靚情報，分分鐘又有一些新產品啱我用！

韓國是形象大翻新之地，每次我必定會去髮型屋執下髮型。次次都有人讚靚，所以我會去韓國「修剪電」頭髮，但就不會染髮，因為貴過香港。

時時見到那些韓國女星塊面水潤令立立，我又想要！於是今次去試埋佢哋嘅facial；正確地講，韓國叫做「皮膚管理」。上到去reception，填寫完基本資料後，他們就安排了我與醫生在房間裏會面，深入了解我的皮膚狀況，以便找出我應該做哪些療程。諮詢完就準備做護膚了！

首先幫我深層清潔卸粧，之後幫我去角質，接着用超聲波儀器導入一些啫喱膏，再用一塊鐵片的東西在整塊面上滑來滑去，感覺有電流在面上走動，卻沒有觸電，亦不會感到疼痛。之後，太陽出來了！

她們用紅外綫燈光儀再照我15分鐘，暖暖的紅光將保濕乳液滲透到肌膚底層。照完燈後，再敷上好厚的深層面膜，這面膜又繼續在滲透補水，加強肌膚保濕。卸除面膜後，嘩！塊面真係好水潤呀！但當我再走到街上時，感覺塊面又乾番！我喺香港做facial，濕潤感好似仲維持得耐些。

嚟韓國大翻新，點可能唔去整容？女朋友的美容代理幫我安排了去做諮詢。在預約同醫生見面前，要先登記旅遊證件和信用卡資料，可能驚你會唔出現。

到了成座11層、全部都在同一間整容醫院內，好多眼腫鼻腫、用沙布包住個豬頭嘅人，完全好自然咁來來往往，別有一番景象。至於我嚟搞啲乜？如果我話只是去見識下，你會信嗎？

（本欄逢周四刊登）