【聲明】港生活網站並無進行電話推廣活動

陳淑蘭
陳淑蘭

多菌環境下如何保護自己

發佈時間: 2019/06/13

在這種天氣下,時凍時熱又多菌的環境,如果你都無病倒,你身體果然係好!我一向抗菌力都算強,託賴,因為我識保護自己!

每次去韓國,我只垂涎Oppa(韓國帥哥)嘅美色,但絕對頂唔順韓國人唔用公筷的習慣,一旦同枱食飯,就算三唔識七,都可以不分彼此攞着沾滿自己口水嘅湯匙往湯碗裏舀,就算佢哋咳,咳完唔會有避忌,照用含過入口嘅匙羹「往湯裏湯裏去,鍋裏鍋裏去……人生有幾個十年」,只要你中咗同枱人嘅菌,就係咁先!

我有位高人契爺,屋企門外掛着一個牌寫住︰「感冒者不得入內」。有一次我唔小心帶咗個有感冒嘅朋友去他家畀佢醫病,朋友坐唔夠一個鐘,但我契爺之後就病咗一個月,即係話︰高人都難敵感冒菌,唔講得笑!我當然畀周邊人鬧到狗血淋頭,唔敢抬頭。嗰時仲未有沙士,契爺已經同我講︰「好快有一日,個個人出街都會戴住口罩。」想當年,完全唔知契爺講緊乜,到2003年沙士襲港,先明白契爺嘅預言。所以契爺食飯必定用公筷,遇到食飯時口沫橫飛的人,見勢色唔對,會立即撤退。

每次我做緊電台節目時,杜雯慧都會用一種綠色消毒噴霧對住個咪和空氣噴,當我聞到嗰啲噴霧時,會覺得刺眼、chor鼻兼呼吸困難,有時噴得太多會令人頭痛。市面上有好多噴霧都話可以殺死空氣中的細菌,但噴的過程中,有機會連自己都中埋毒。所以咪亂噴市面上的消毒噴霧!年前,我終於搵到一隻專家實證話可以殺滅空氣傳播病毒率達99%、空氣致癌物質分解率達90.4%等等,我親自驗證,兜口兜面咁噴都99.9%安全,因為屬全天然配方,BB同狗都可以安全使用。

為了對社會有些少貢獻,我唔會含血噴人,只會用「貝達安」噴人,至少可以畀你吸啖好空氣!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭