互動裝置打卡 睇超現實作品 暑假玩轉夢幻水世界

炎炎夏日，去「玩水」就最適合啦！公關姊妹同黛安講，信德中心嚟緊會有一個「SUMMER DREAMING」活動，特別打造出一個5米闊嘅夢幻水世界裝置，當中以水藍色為顏色主題，裏裏外外都充滿濃濃海洋氣息，更有霓虹燈泳池磚牆、水母投映牆等打卡裝置，當中每隻水母會散發黛紫色嘅海洋之光，企喺度selfie更添神秘色彩。

黛安仲知道，呢個「水世界」除咗打卡一流之外，亦設有體感遊戲，大家可以同地下自由游動嘅「鯊魚」互動，掂一掂佢哋，就會作出相應動作，又靚又好玩！

此外，今次商場仲特別聯乘本地人氣攝影師Tommy＠SurrealHK，喺水世界中破格展出20幅超現實作品，透過有趣改圖，好似「林寶堅尼的士」、「白雲雪糕」等，希望鼓勵都市人放鬆。Tommy仲特別為商場設計咗兩幅新作，分別係《我眼中只有雪條》同《食甜品要選時間地點嗎？》，並於水世界裝置兩側打造成畫牆，非常有趣，鍾意嘅朋友，記得6月28至8月22日去睇吓喇！