香港六月

發佈時間: 2019/06/25

香港六月

2小時前

又開始了。有人離開了某些WhatsApp群組,有人Unfriend了某些臉書朋友,有人大叫︰「真的要自我檢討一下,點解會群埋呢啲人?」社會嚴重撕裂,又豈限於警隊vs示威者、政府vs市民、鬼vs鬼……

飯局上明知某些人完全道不同,我會避談香港六月;群組裏明知當中有撑也有反,我就不會隨便forward新聞或文章。是社交禮儀,是一種尊重。我們心知肚明,就算自以為好持平好冷靜,話題點着火頭,終會不歡而散;反正大家根本無可能說服對方,亦無打算理解對方,點爭拗都無結果,就無謂白白令自己血壓飈升,隨時腦中風。

只是全城大事,人人都會申明立場,逼你埋牆。在灣仔街坊小店換手機芒貼,麻甩老闆忽然發話︰「叫林鄭落台?人哋其實可以去英國歎世界,都選擇留低咁辛苦喎!派個唔知乜水嚟管香港,仲驚喎。」在酒過三巡午夜時分,阿凡達友人硬要發表偉論︰「無人叫你出來遊行,中催淚彈自己攞嚟,又怪政府?修例關你咩事,六四關我咩事,你哋太多事。」70歲的黃亞媽坐在梳化追看《倚天屠龍記》,無端端講︰「都唔明個政府點解咁心急咁不顧一切,第一次咁多人遊行抗議都係要推,搞到依家一鑊粥!」見招接招,或微笑或黑臉或反枱或沉默。和而不同,只在理想國出現。

民間智慧大鳴亂放,但現在最需要的是上位者的管治智慧。Amen...Hello?

1星期前

人在雲南,一直緊追香港消息,友好們大多情緒激動,憂心忡忡。忽然間,有人提醒大家快些delete群組及網上留言,怕被監控了、留底了,怕被事後清算。我不禁問了一句︰究竟怕甚麼呢?又沒有站到最前掟磚豎中指,甚至沒有送水送物資,只不過私底下抒發了感受、睇法,分享了新聞、文章而已,這就是白色恐怖,這就是我們內心的恐懼,你仲要問︰都無犯法,有乜好驚啫?

(本欄逢周二刊登)

撰文: Esther Wong 廣告創作人,「ManyMany More興趣小組」創辦人。
欄名: @實時生活