蚊叮蟲咬救急良藥

「白日蒼蠅爾飯盤，夜聞蚊子又成團。每到夜深人靜後，定來頭上咬楊鸞。」這是來自唐末五代文人楊鸞嘅詩《即事》。我唔係文人雅士，但讀呢首詩時，我可以感受到作者嘅癢處……

前幾天在蘇州同朋友們吃完晚飯後，去一間大品牌的酒店大堂酒廊飲嘢，飲到咁上下，我身邊所有朋友開始不停痕，嘩！一個二個手腳即時一撻撻紅印。同服務人員投訴，佢哋即時畀支用咗大半嘅蚊怕水畀你噴！真係有無搞錯！室內都有咁多蟲咬！既然一早已備有蚊怕水畀客人，即係佢哋都知道有蚊或蚤啦！竟然唔去做好啲滅蟲服務。嗰晚我好彩，啲蟲淨係咬我朋友，但避得一晚，唔避得第二晚。

之後我去到上海，吃完晚飯後，朋友招呼去一間高級卡拉OK消遣，玩到咁上下，返到屋企發現我成腳畀嘢咬到一撻撻，核突不在話下，最攞命係痕得要死！我第二朝去機場，由上海一直𢯎痕𢯎到返香港，難睇兼難受！

返到香港，即刻用我在日本搜購嘅Una Kowa Ace L救命。產品除提供清涼的薄荷醇、合成樟腦，以及局部麻醉劑的利多卡因（Lidocaine）、抗組織胺的鹽酸苯海拉明（Diphenhydramine），還多添加了PVA成分康速龍錠（Prednisolone），它是類固醇，用來抗發炎，若已有紅腫的發炎反應，尤其是被毛毛蟲、蜈蚣、跳蚤、蟎蟲、水母等叮咬，都會有很嚴重的發炎反應，喺呢個時候，就要用這系列來減緩劇烈痕癢和減低發炎及紅腫了。

另一款Makiron止癢膠布ACE係加入咗消炎的類固醇成分，配合抑制搔癢的抗組織胺等有效成分，能夠紓緩蚊叮蟲咬後的發癢和腫痛，喺瞓覺前貼在患處可防止熟睡後不自覺𢯎傷癢處。如果你痕到飛起，又無止痕產品，可以試下喺癢處幫自己灑鹽，呢個輕微刺激，肯定比人哋喺你傷口度灑鹽爽！

（本欄逢周四刊登）