STEAM有「營」派對 探索美食兼保育

營養對小朋友嚟講相當重要，原來仲同依家大熱嘅STEAM有好大關係！黛安知道，較早前嚟自14間學校嘅300幾名學童，齊齊參加咗一個名為至「營」STEAM派對，透過綜合科學、科技、工程、藝術同數學STEAM中，學到嘅食物及營養知識，加上自己嘅創意，喺各自攤位中製作出唔同嘅有「營」食品，然後再由評判現場試食及評分，競逐各項獎項，寓教於樂。

黛安仲知道，今次派對「營養探索之旅-食、知、源體驗計劃」」係由聖雅各福群會助學改變未來服務主辦，社署攜手扶弱基金同「維他奶」贊助，呢個計劃主要係透過互動課堂、創意食物工作坊、戶外考察等方式，教育各位小朋友營養探索，當中「食譜」包括豆奶雪糕、芒果奶蓋等美食，例如可以用豆奶等植物奶替代牛奶；用植物為本嘅飲品製作多層彩虹特飲等，小朋友進行實驗之餘，亦可以探索到分層效果背後嘅原因，仲可以學識點樣對環境更加友善，黛安都覺得呢個計劃好有意義！