無懼逆境克服困難 20位青年獲嘉獎

一班年輕人面對逆境仍然積極面對人生，令人動容！黛安知道，由香港青年協會主辦，連續第2年獲中華電力作為活力夥伴嘅「中電新世代‧新動力獎勵計劃」，上周六舉行咗頒獎禮，表揚20位本地年輕人。

殷齡係其中一位得獎者，佢自細患有羅素西弗氏症，因病令佢身材矮小而自信心低落。讀小學時沒太多朋友，好彩升中後突破身高限制，喺花式跳繩同獅藝活動展現靈敏一面，令佢有番自信心後主動認識朋友。殷齡就話未來想成為律師，為社會不公義嘅事情發聲。

香港青年協會總幹事何永昌話畀黛安知，呢個獎勵計劃有超過107間學校同青年服務單位提名236位學生，最終選出20位得獎青少年，佢地年紀細細已面對人生好多挑戰，但係佢哋都不畏艱辛克服問題。