臭屁可變香？

前幾晚食完飯，便同狗狗貓貓睇電視。突然聽到「呠」一聲，繼而飄來臭味……我問邊個放屁？其中一隻松鼠狗Krug，泰山崩於前不動於色，甫士不變，只是揚一揚自己的尾巴，將味道撥散，果然有其母必有其狗！

我喺好朋友面前，都時時有嘢亂講，有屁直放。我啲好友已經習慣兼體諒，皆因佢哋知我食嘢快，又鍾意飲大量碳酸或有氣飲料，再加上口沒遮攔，又講又笑，便造成了吞氣症（Aerophagia）。所以通常我嘅氣體排放時間，係飯後一兩小時之後。

你而家可能邊睇邊鬧我，乜你咁核突，好講唔講，講屁……其實呢樣嘢係身體運作嘅一部分，正如美國腸胃病學院醫生雷蒙（Patricia Raymond）博士都話，通常人一天正常會放14個屁。喺乜嘢時候會特別想放屁呢？有研究顯示，當你坐飛機嘅時候，因為高度會影響我哋體內嘅腸胃脹氣，而因為氣體膨脹，所以會想放屁；其次係我哋唔消化所食嘅嘢，都會製造屁排放。通常愈健康嘅食物愈會令屁比較臭，例如水果、蔬菜、全穀、豆類、洋蔥等食物，都會令屁產生臭味。

咁究竟屁臭係唔係好事？有醫師話，響屁臭的話，健康情況唔係咁理想；響屁不臭，係正常；屁既不臭又不響，即係靜雞雞鬼鬼祟祟放咗屁都無人知，恭喜晒，非常健康！之但係如果你係長期放臭屁，兼大便有血，請盡早求醫接受檢查，因為大吉利市有機會係大腸癌或直腸癌。

喺公眾地方放臭屁，又的確幾無公德心。但如果屁唔臭兼帶香味呢？法國一間名叫Lutin Malin的公司，生產咗一種號稱可以令「屁味變香」的膠囊！佢哋表示食咗呢款「香屁味膠囊」，可令你嘅屁味散發出一股好似玫瑰花般嘅清新香氣……咦？咁以後女人放屁，咪可媲美仙女散花？

（本欄逢周四刊登）