從任達華遇襲說起

上星期Simon任達華在中山出席活動時遇襲，腹部遭兇徒刺傷，隨即被送到中山開發區醫院。他遇襲後臨危不亂，立即在微信發錄音短訊求助。在錄音中，他稱兇徒為「發神經朋友」，十分有修養和厚道。他在內地醫院做完手術，情況穩定後數小時，網絡已瘋傳其入院照及個人病歷。如果以上資料真的外洩，我對內地醫院如此不保障病人的私隱，徹底感到失望。

其實好幾年前，我在內地有一次唔舒服想去睇醫生，朋友認真問我係咪真要去。吓？咁奇怪？唔舒服當然想去睇醫生啦。朋友說在內地睇醫生好open，醫生幫你睇症之餘，睇埋你旁邊的病人；診斷你的病情時，你周圍的病人不分男女、甲、乙、丙、丁，全部一齊聽，就算你係睇前列腺，都好公開咁指點，好似開研討會咁。我聽完真的不敢去，希望今時唔同往日啦。

講開入醫院，有兩個住在澳門的朋友，分別話佢哋試過有意外，差點就踩入鬼門關，去到醫院時，醫護人員會好緊張你，問你有無帶夠錢才會醫你。因此他們盡量都來香港就醫，所以香港的醫療真的算不錯。

至於全球最佳醫療的保健國家，馬來西亞憑藉其世界級的醫療保健服務與先進的醫院設備，排名第一。

就算你是到馬來西亞工作的外派僱員，也可以選擇到私立或公立醫院，以滿足各自的需求。雖然私立醫院醫療服務會貴些，但比公立醫院的醫療服務更接近西方標準。你不需要提前預約，亦不需要家庭醫生的轉介信，就可以去搵專科醫生問診。價錢相宜之餘，醫護人員及藥劑師們都訓練有素，見多識廣，我諗最少在保護病人私隱方面會做得更好。好！等我都安排去做體檢，看看馬來西亞醫療係咪咁number one先。

在此祝任達華身體快些復元，吉人自有天相！

（本欄逢周四刊登）