有無藥醫？

1天前

八月五日東主頭痛心翳，停工一天。晨早水都未飲就開了電視和電腦，同時間睇幾個傳媒報道，新聞片段各剪所需，各有立場，睇邊一個都會好嬲，因為都是事實，但又明白不是事實之全部。

大台新聞見到真市民和示威者對罵，港鐵有孕婦穿了羊水都無人理，示威者大晒惡晒，呼籲罷工變成阻人返工。用丫叉掟磚又縱火，搞人警察宿舍一家大細。有少女大叫︰「香港無前途，我哋無前途！」警方苦口婆心勸說︰「前途唔係用咁嘅方式爭取㗎，你只得十幾歲咋。」

面書上的網媒就指向暴警打父圍子，成頭血……街坊都打？穿拖鞋無裝備都打？女示威者被拉到甩褲竟然被強行遊街，完全濫權侮辱女性，尖叫聲好淒厲。議員同助理被拉要跪低，記者、社工阻路照打……處處火光熊熊，憤怒焚城。

影像、文字、圖片是非常powerful的工具，睇完大台，令人即時激動大叫︰「暴徒無法無天！拉晒佢哋！」跟住睇Facebook又會即時火滾大嗌︰「警察無法無天！調查佢哋！」短時間兩邊輪流撕裂，精神瀕臨分裂。

已奉勸我年紀大、血壓高的父母少睇電視新聞，他們的情緒深受影響，極度焦慮。又奉勸朋友們上網時間不要太耐，因為他們很憤怒又抑鬱。香港人已經患上集體性精神創傷，有排醫。

2天前

需要唞唞氣，逃離一下現實。最近愛上了英劇《摩斯探長前傳》（Endeavour），以60年代英國牛津為背景，震撼人心的古典配樂，角色都愛玩報章填字遊戲，曲折起伏的查案推理，含蓄浪漫的愛情兜轉，just too beauitful！不眠不休殺晒六季！最新一季講政、警、黑聯手作惡，用賄賂、暴力去威脅幾位正直不阿的警官主角同流合污，這當中需要多大的勇氣、智慧和堅持，才可改變局面？劇集世界裏當然是正義得勝，真相大白……是的，我現在真的很需要這些antidote。（https://youtu.be/k35yGEeql6Y）

（本欄逢周二刊登）