學習苦中作樂

人生短暫，輸甚麼都好，千祈唔好輸心情，放輕鬆，畀機會自己學習快樂。成長路上，開始遇上不如意的事和人，幾樂天的性格都會被侵蝕。天生樂天難自棄！喺呢個世界上，一定要保住快樂。所以我時時都鑽研點樣可以令自己快樂。

原來每一件事都唔應該畀情緒去決定你的反應，而是由你的思維方式去決定反應。壞事有幾壞，其實就取決於你自己。

譬如說踩到一篤狗屎，有些人覺得正呀，自己就嚟發財了；但亦有人覺得自己行衰運先會踩到屎，於是好沮喪。所以開唔開心，唔係由屎決定，而係你點樣睇呢篤屎去決定。你的情緒，你絕對可以主宰管理，所以有了這個認知基礎後，我哋可以學習令自己快樂。

人生總會遇到唔順遂的事，你可以試下咁諗︰三年之後，我仲會唔會介意呢件事呢？如果唔會，咁就話畀自己聽，唔好太耿耿於懷了，要盡量將快樂放喺你價值排序上的第一位。

好多時候我們的不快樂，是執着於面子上。一個愛面子的人，通常都無乜面子的。

好多人以為開心的人是因為樂觀，其實唔一定。要懂得享受當下，能夠每日做到自己喜歡的事，能夠同自己喜歡的人一齊，賺咗！

只要在一件事的過程中你能夠得到快樂，能夠學到嘢，無論結果如何，你都無蝕底。

我們一定唔好畀唔識或者無關重要的人左右自己情緒，畀佢哋影響到，輸咗！係輸畀自己。

無論如何，一定要學識愛自己。痛苦的根源並非來自外在，而係來自對自己的不滿。當你能夠真正愛自己，你才能夠領受由內至外散發的快樂。

在如今的時勢，如果不盡量學識苦中作樂，真係隨時會癲！

（本欄逢周四刊登）