【聲明】港生活網站並無進行電話推廣活動

Esther Wong
Esther Wong

不要AirDrop 你嘅無知畀我

發佈時間: 2019/08/13

2小時前

人不可能乜都識晒又乜都學得快,但最緊要肯虛心學習,問人或google搵搵,切忌唔識扮識,信口開河,失禮自己。

我一直對嬰兒、小孩零興趣零耐性零認識,幾年前竟然帶隊幫舊公司在大中華區贏了一個美國奶粉客。全靠團隊事前做足功課,我日研夜究,度完蹺再跟公司的媽咪同事們再三review了解,務求對準消費者的心態和行為,不能夠「創意」大晒,罔顧現實。當年的廣告對手嘗試賣蹺,要幾歲小孩跟爸爸在開着爐火的中國式廚房玩親子,毫無insight,客戶反眼。

這次賺到的不只是revenue,還有重大發現︰原來小朋友咁可愛㗎!笑容純真,眼神清澈,恍如小天使,是這世界美好的存在~自此見到佢哋我都會好開心!(尖叫無禮的小魔怪不算,也只怪罪父母縱容。)很多的無知皆源於懶惰,識多啲,一定有賺。

1小時前

有見Apple 2011年登場的AirDrop遺害深遠,令「老退化」精英人士誤以為是科技大發現,是反社會新興武器,一於解下畫先。

不是空投、空襲,AirDrop是一個ad-hoc連結功能,讓你可以與附近的Apple裝置(即係iPhone、iPad呀咁)即時分享相片、影片、文件及其他內容;接收用戶必須accept,檔案才會收到,好安全;不必再用email,直接方便。唔明?去link!https://support.apple.com/zh-hk/HT204144

講極唔明是常見的事,同事仔教我剪片都教到佢精神失衡,我教黃老太用WhatsApp x1000次教到頭暈,終於體會到「學無止境」真正意思。不想咁快跌入「廢老」一族,這些生活日常還是要學。若然堅持做石器穴居人,無所謂,自由意志大過天,只是唔該匿在山洞,無謂走出來大放闕詞,展現無知。

(本欄逢周二刊登)

撰文: Esther Wong 廣告創作人,「ManyMany More興趣小組」創辦人。
欄名: @實時生活