【聲明】港生活網站並無進行電話推廣活動

陳淑蘭
陳淑蘭

斷交平台與回音室

發佈時間: 2019/08/15

我相信早期的社交媒體,大家都想用來吸收社會或朋友的資訊,聯絡一些自己關心的人,去加強人與人之間的緊密聯繫。但是這個社交平台,近期已成為斷交平台了。

我雖然口沒遮攔,但也沒有在自己的「公眾號」發表政見。近期只要一講到政治,哪一邊唔啱聽,肯定都會炸到你體無完膚,我無謂自己跳落個糞池入邊,找屎上身。既然三唔識七無交情,何必要同佢交惡呢?就算在自己的私人帳號,都無乜評論政治,亦費事講得太㷫烚烚,唔知邊度殺出個內奸幫你發出去,又惹蟻上身!

我只將我認同或欣賞的文章或片段,分享到自己專頁以供自己細心閱讀或作留念,我甚至都不寫上款或敘述,但某些朋友依然會入內,客氣地發表不友善的評語。只要你唔係直接人身攻擊我,我都無乜所謂,唔會因為你我政見不一,就unfriend對方,但人家unfriend我,就不能控制,悉隨尊便了……

我嘅底綫,係希望大家識得互相尊重,你唔啱聽唔啱睇,咪取消追蹤或delete我囉。既然大家都追求民主,點解仲有咁多人,會特登入去人哋個專頁度踩場撩交嗌呢?正所謂道不同不相為謀,真的要unfriend都無辦法,亦無謂喺呢個時候因價值觀唔一樣,產生撕裂到撕臉。大家呢刻迴避下,希望他日天下太平,你我友誼依然……

我提醒自己不要沉在回音室效應(echo chamber effect)內,同一圈子內通常同聲同氣,於是大家交換的資訊都是「塘水滾塘魚」。為免造成偏聽和偏見,我亦希望聽到各方不同有建設性的意見。朋友們雖然總有政見唔夾,各有各嘅立場和見解,就算顏色不同,我深信都不想有個暴力社會;但如果你係支持暴力行為嘅話,唔該你即刻unfriend我,等我及早清理,睇清我身邊嘅膿包,及早有運行!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭