玩親子互動遊戲 推廣愛護動物

做善事又可以買到得意小飾物，真係一舉兩得。黛安講緊嘅係香港愛護動物協會（愛協），佢哋今個星期六、日（7日及8日）會喺愉景新城舉行「愛『飾』動物日2019啟動禮暨嘉年華」。活動上將有指紋分析團隊，幫市民免費做指紋分析，畀大家搵到屬於自己嘅動物性格，希望大家明白動物同人類一樣都有獨特個性，需要得到尊重同接納。

愛協亦會舉行親子互動節目，例如寵物小劇場、親子T恤設計及慈善義賣攤檔，希望小朋友透過遊戲學習與動物相關嘅知識，明白動物如同家人，需要用心守護。如果想參加，記得今個星期六起至10月4日，登入https://aniform-day.spca.org.hk/報名同捐款喇，凡捐款$100、$200或$300，分別仲可以獲贈Mr. Men Little Miss七型動物襟章、動物造型手挽袋及T恤。