香港迪士尼首創互動表演 5大「惡人」玩轉萬聖節

話咁快又就到萬聖節，又係時候出去樂園感受下氣氛！其中香港迪士尼樂園就啱晒一家大細喇。黛安知道，香港迪士尼下星期四（12日）起至10月31日期間，將舉行年度主題活動「Disney Halloween Time」，仲炮製咗全新嘅原創大型Live歌舞滙演「惡人舞動迪士尼」，由5位經典迪士尼反派人物領銜主演，觀眾仲有機會獲邀上台互動！

黛安知道，今次香港迪士尼全球首創嘅「惡人舞動迪士尼」陣容鼎盛，包括《小魚仙》入面嘅邪惡女巫烏蘇拉、《公主與青蛙》中將王子變青蛙嘅巫師霍博士、《101斑點狗》嘅庫伊拉、《魔髮奇緣》嘅嘉芙夫人，同《美女與野獸》嘅加斯頓等角色，會現場演繹多首經典迪士尼歌曲，仲有空中飛人、木偶戲師同魔術師等表演，加埋完美嘅舞台設計同靚衫，絕對賞心悅目。香港迪士尼樂園度假區娛樂事務及服裝部創作總監華文迪（Randy）介紹，成個歌舞滙演籌備超過半年，無論舞台音樂定服飾都悉心設計，希望令觀眾眼前一亮！

萬聖節活動期間，仲有全新嘅「阿Jack聯群作惡」音樂表演同加入更多驚喜元素嘅升級「怪誕城之旅」，超可愛嘅小吸血鬼Vampirina仲會首次現身香港迪士尼，同各位粉絲會面，真係唔可以錯過！