唔怕大大聲,最驚得把聲

發佈時間: 2019/09/10

唔怕大大聲,最驚得把聲

3天前

大大聲,呢啲先係friend!

B是阿姐級創意前輩,我哋細細個入行時,她已經成身Issey Miyake、George Jensen,放假飛米蘭睇時裝騷,嘩!咩嚟㗎?大開我哋班土炮眼界。她太口直心快,為人太熱腸熱腦,對朋友尤其肉緊,大大聲畀意見、大大聲講睇法,之所以好易激嬲人、自己又唔明解。咁多年能成為好友,因為睇穿了她是善心人、有心人,so real so beautiful~。一提到年輕學生寫定家書出去抗爭,佢就停不了流淚;一想到很多小店現在生意受到影響,佢就山長水遠熱死辣辣,專程到深水埗小店買一些其實自己無乜需要的小物,分送給朋友,以示小小支持。到台北旅行,見到有我曾經睇過的棉襪牌子,又會買返來送給我,觀察力、記憶力超強,真的是「襪」輕心意重。

入得friends list,有錢有面有才華哈哈哈當然唔介意,但最緊要係有heart。

2天前

得把聲,一定唔係friend……

「放心!你叫到!一定一定幫手!」「你叫晒呢個同呢個去畀面派對,下次要叫埋我喎!」太認真你就輸了!通常到你真的請佢幫下忙,即使只是小意思小小事,就會給你十萬個excuses左閃右避,但明明佢有事叫到,我一定立刻幫口或幫手,support support……

做朋友要「有來有往」,不是指利益輸送,而是指珍惜和尊重。

年紀唔細,時間無多,生活必需要更加揀擇,那些錯放在朋友category的「朋友」,要及時將之放回原位,不必太上心,毋須太認真。

(本欄逢周二刊登)

撰文: Esther Wong 廣告創作人,「ManyMany More興趣小組」創辦人。
欄名: @實時生活