【聲明】港生活網站並無進行電話推廣活動

黛安
黛安

PMQ新藝潮博覽會11月登場 百位藝術家共襄盛舉

發佈時間: 2019/09/11

黛安平日都好鍾意去睇展覽,可以增值兼擴闊眼界,最近就收到風,第三屆新藝潮博覽會喺11月1至4號將在中環PMQ元創方舉行,今次有100位藝術家參加,真係人才濟濟,展覽分三大系列,包括國際藝術家系列、多元系列和特別計劃系列,黛安都非常期待!

國際藝術家系列有62位參展藝術家參展,嚟自中國、日本、德國、法國、波蘭等地,當中包括街頭藝術超新星美國藝術家Mr. Likey;被譽為香港學歷最高、技法最好嘅畫家廖井梅;仲有嚟自法國、自行創造特殊材料嘅Raphaele de Broissia;以及德國藝術家Pia Kintrup等,佢哋嘅創作都各具風格。

佢哋嘅作品會競逐「新藝潮國際藝術家獎」,評審團由資深藝術界人士組成,包括著名藝術家宋冬、浸大視覺藝術院總監Louis Nixon、浸大視覺藝術院客席教授鄧海超、紅門畫廊創辦人Adriana Alvarez-Nichol,同著名收藏家及藝術家張朱秋慧,獎品包括為期3個月嘅台北寶藏巖國際藝術村駐村計劃。

另外,多元系列係由唔同藝術單位、畫廊和藝術家組成,例如Fridgemind帶來英國藝術家Will Blood作品、HK Youth Association帶來11位青年畫家,包括克服脊椎問題獲獎無數嘅鍾凱霖等。而特別計劃系列Next+,就會展現新一代創作才華和最新藝術趨勢,帶來更多元嘅視覺體驗,包括NEXT SPECIAL、NEXT CONTEMP、NEXT ALL STAR。

姊妹話,新藝潮博覽會門票已經喺ticketflap有售,想知道更多參展藝術家簡介同資訊,可睇下新藝潮官網或fb。

第三屆新藝潮博覽會將於11月舉行,大家要把握機會去欣賞作品啦!

撰文: 黛安 消息特靈八卦公關
欄名: 八卦名利場