7-Eleven麵包兵團出動 同你DayDay歎早餐

早餐係每日最重要嘅一餐，食飽先有精神開始新一日嘛！之前黛安介紹過7-Eleven引入咗多款人氣日式口味麵包，原來佢哋之前仲舉行咗「7仔麵包兵團」繪畫及四格漫畫創作比賽，邀請咗全港小一至小六學生參與，仲用咗優勝者作品嚟作為動畫故事影片題材。

早前7-Eleven就以佢哋新推出嘅人氣麵包口味作為構思，創作出「7仔麵包兵團」，每位成員嘅性格都係來自佢哋麵包口味嘅特質，有趣又可愛。7-Eleven更為此舉行咗一個繪畫及四格漫畫創作比賽，並由讀小四嘅容碩宏同學攞到高小組冠軍，同學仔除咗獲得豐富獎品，得獎作品仲被製成「國王的新包」動畫故事影片，即日起喺7-Eleven官方fb播放。

動畫描述生活喺麵包王國嘅公主忌廉妹，因為對日常早餐食嘅麵包感厭倦，拒絕食早餐，國王下令侍衞幫手搵嚟3位麵包工匠，包括聰明開朗嘅蜜瓜哥、有衝勁但火爆嘅咖喱仔同文靜嘅小紅，為公主獻上滋味、簡單、用心、軟熟嘅日式麵包，令公主同國王讚不絕口。作品咁有趣，記得去7-Eleven fb睇下啦。