6米高千願亭 聳立維園照亮中秋

今個星期五（13日）就係中秋節，當然要好好慶祝啦。黛安聽公關姊妹講，13至27日期間，維園將會展出一座6米高嘅千願亭，當中採用南中國豐收時「燒火塔」嘅獨特形狀，糅合台灣「放天燈」許願概念設計而成，照亮人月兩團圓佳節嘅夜空。

黛安知道，今次呢座千願亭係出自「築夢‧社」創辦人兼首席總監、2019年建造業傑出青年得主蕭國健之手，當中使用咗5,000塊高熔點、高耐熱嘅再生高密度聚乙烯塑料磚築成，每塊磚都安裝咗帶照明效果嘅LED燈，以配合中秋節嘅節日氣氛；到時大家仲可以透過設於建築物頂部嘅天窗，細心欣賞中秋皎潔嘅滿月，相當令人期待啊。