港生揚威國際數學賽 奪10金兼創3連冠

香港學生又再揚威海外喇！黛安收到風，知道日前兩支香港代表隊、共32位學生出戰「2019 IMC國際數學競賽（新加坡）」和「2019世界數學資優邀請賽」（WTIME），都報捷而歸，其中，IMC賽締造咗10金紀錄，仲連續三年勇奪小三級全場總冠軍，成就三連冠！

今年IMC踏入第15屆，8月4至5號喺新加坡舉行，參賽者來自全球20多國家或地區、超過1,200位學生。香港就共派出29位就讀小一至中三嘅學生參賽，全部都奪獎而回，一口氣摘下10金、10銀、9銅，其中吳羿璋同學仲勇奪小三級全場總冠軍。而WTIME賽事就喺8月18至19號喺泰國清邁舉行，學生參加人數超過600人，香港代表隊亦摘下1金、2銀；沈裕舜同學更奪得小五全場總冠軍，認真厲害。

帶領兩支團隊參賽嘅香港數學奧林匹克學校梁瑞萍校長話，好讚賞同學們嘅努力，亦都感謝家長們嘅付出。