全球首個紀念賽 高達迷跑入科學園

「機動戰士高達」自1979年播放以來，陪伴我哋度過好多個童年美好時光，今年適逢高達誕生40周年，Medialink「羚邦集團」就舉辦全球首個「Gundam Run高達跑」，下個月20號喺科學園有得玩喇！

黛安聽公關姊妹講，「Gundam Run高達跑」將設2公里Fun Run、5公里個人賽同10公里個人計時賽，滿足唔同跑手要求，畀「地球聯邦軍」和「自護軍」粉絲藉此大顯身手，一同出征跑出超越自我好成績！

姊妹話，比賽歡迎參加者發揮創意，自訂比賽服飾同造型參賽，參加者喺網上報名可獲限定精美選手包，活動當日仲有高達主題嘅攤位遊戲、模型、打卡位同唔同限定紀念品，畀高達迷掃貨。黛安約咗好友參加啦，高達迷記得唔好錯過！