環保有着數 回收膠樽獲贈現金 可口可樂X八達通攜手推出

港人環保意識日漸提升，好似坊間嘅膠樽回收方式亦愈來愈多，黛安收到風，香港太古可口可樂同八達通卡有限公司及世界綠色組織攜手合作，推出咗「嘟一嘟•樂意收」膠樽回收現金回贈計劃。

大家只要攞啲膠樽去到指定回收機，用八達通拍一下確認，再放個膠樽入回收機，拍多次八達通收錢就得。每個膠樽可以收番2毫子現金回贈，而每張八達通每日最多可領取10蚊，真係環保方便又易用！

黛安仲知道，呢個智能飲品膠樽回收機可以接收唔同品牌嘅330毫升至2公升飲品嘅膠樽，而回收過程中仲會掃描膠樽上嘅條碼，去蒐集資料數據統計分析，之後壓縮處理埋，就會由認可嘅回收商統一回收處理。每部回收機可以儲存大約400個500毫升嘅飲品膠樽，每分鐘可以處理大約20個膠樽㗎。

太古可口可樂執行董事（香港及台灣）利偉達話，所有持份者，包括政府、商界、消費者及住戶等，透過共同承擔責任，同心協力參與其中，一齊推展相關策略同行動，先有望成功做好環保。

世界綠色組織創辦人及行政總裁余遠騁就話，有調查顯示，3成市民每星期都會飲3至4枝膠樽裝飲品，但有72%人會將膠樽丟棄喺垃圾桶。黛安都希望大家一齊努力，好好愛惜我哋嘅地球。