唔得！唔得！唔得！

雖然我離開正規工作一段時間，但十分喜歡了解目前的職場生態。千奇百趣的個案除了得啖笑外，有時也為我帶來不少生活上的反思。

一位非常能幹的主管朋友最近轉工，我以為她身經百戰應該很快適應，誰知最近每次與她見面，她都唉聲嘆氣，原因是新公司同事的固有文化讓她沮喪。簡言之，她每次叫下屬完成一件差事，即使是普通不過的工作，下屬回應的第一句必先彈Job︰「吓？不嬲唔係咁做喎！」「哦！呢樣嘢我唔識做㗎喎！」「得番一星期時間，邊度做得切呀？」

一個如是，兩個如是，三個如是……朋友很想大發雷霆說︰「你唔試過點知做唔到呀？」但始終初到貴境，不想一開始僱傭關係太差，惟有像媽媽般耐心教導下屬︰「唔緊要，慢慢來，畀啲信心自己，一定得㗎，乖呀吓！」只是尚欠給同事掃背安撫。

我聽罷再反芻她的說法，設身處地代入員工的角度細想。老實說，我也試過面對一些上司超高要求，出於自我保護機制，或是自信心不足，寧願彈Job，也不想衰在老闆面前，企圖落閘以降低對方的期望。不過，我得承認，次次說：「唔得！唔得！唔得！」不惹怒老闆，也會令他反感，年尾的工作表現評核好極有限，直接打擊晉升機會。

能幹的主管朋友說，十多年前當她仍是下屬的時候，老闆跟她說要升她職，還授予一個職場致勝關鍵︰「點解我升你唔升其他人？因為我鍾意你嘅工作態度，永遠唔會好似其他同事咁，一開始就話『唔得』，而係永遠回應『係』、『好』、『知道』，表現積極。最終做唔做到係一件事，但起碼我見到你努力過，呢啲先係正確嘅工作態度！」

職場上，我們不必次次做「Yes Man」，擦鞋奉承上司，但至少給對方看到自己的積極、嘗試與努力。我想，雖然部分老細是「腦細」，但大部分上司都是明眼人，誰勤力、誰懶惰、誰是老海鮮，一眼便看得出。一開始便拒人於千里外，無論職場上、人際關係上，都絕對不是受歡迎的人物。

（本欄逢周一刊登）