香港迪士尼邀13病童家庭遊樂園 享家庭共聚時光

長期住院嘅小朋友，其實好難得可以同屋企人相聚。黛安知道，兒童紓緩服務基金自去年成立以來，服務咗差唔多60個危重病家庭，同醫院醫護團隊合作令佢哋可以走出病房，享受快樂家庭生活。最近香港迪士尼樂園度假區就邀請咗13個紓緩個案家庭，參加一連兩日嘅「魔法保姆樂『童』行」活動，為病童同家人創造家庭共聚時間。

當中唔少家庭其實係第一次全家同遊，好似早前慶祝兩歲生日嘅丹丹，黛安聽媽咪楊太講，丹丹出世時因先天發育不良，有裂顎、左眼失明、失聰等情況，佢要寸步不離貼身照顧，以前想帶丹丹出去玩只係一個奢望。

佢好開心可以參加今次活動，終於可以成家人齊齊整整出遠門玩，仲可以喺酒店留宿，留下美好回憶。

香港迪士尼樂園度假區行政總裁楊善妮話，迪士尼嘅故事觸動唔同世代人嘅心靈，希望同樣可以鼓勵病童及佢哋家人。兒童紓緩服務基金管治委員會會長余漢才亦都話，香港每年約有200個兒童因病死亡，需要熱心大眾同基金努力，好似保母一樣幫助照顧者，共同維護病童嘅生活質素。

黛安仲知道，香港迪士尼一向都關愛本港病童，包括助病童願望成真、帶領迪士尼朋友和義工隊到訪醫院、推動醫院遊戲服務、招待病童體驗最新景點等。最近仲同兒童癌病基金合作，將迪士尼奇妙體驗帶到社區，好似為蘇屋邨全新社區服務中心添置創意玩具同學習器材，切合小朋友唔同需要。迪士尼義工隊亦希望每季安排探訪及「迪士尼故事分享」，將歡樂帶畀病童、康復者及其家人。黛安都覺得佢哋嘅服務好有意義啊！