3公里健障行 支持殘疾運動藝術普及

政府近年大力推行傷健共融，黛安知道，香港傷殘青年協會噚日舉行咗一年一度嘅「健障行」活動，由傷青輪椅隊成員帶頭，齊齊喺青衣海濱公園步行至青衣東北公園，全程3公里，大家都玩得好投入！

公關姊妹分享，今次活動吸引咗多達800名健全人士同殘疾人士出席活動，一齊步行強身健體之餘，大家沿途仲親身體驗咗唔少充滿趣味嘅傷健共融同殘疾人士運動體驗，等參加者體驗同了解殘疾人士嘅運動潛能同挑戰，真正促進傷健共融；所有籌得善款仲會用作推廣殘疾人士普及運動同藝術活動，好有意義！

黛安仲知道，傷青會係一間由殘疾人士自行管理同決策嘅自助組織，每年都會籌辦唔同募捐活動，為殘疾人士提供培訓、就業服務、推動殘疾人士普及運動等，大家都記得多多支持喇！