【聲明】港生活網站並無進行電話推廣活動

黛安
黛安

明年12套特別郵票 李小龍主題最吸引

發佈時間: 2019/10/15

黛安身邊好多朋友都鍾意「集郵」,所講嘅係郵票呀!香港郵政明年就會發行12套特別郵票,每套都各有主題同特色,包括一套會喺已故武打巨星李小龍出生80周年之日推出嘅「李小龍武藝傳承」主題郵票,咁珍貴同吸引,相信一定大受歡迎。

香港郵政每年會推出唔同特色嘅郵票,好似明年農曆正月立春之日,佢哋會有第1套「二十四節氣春」共6枚郵票;黛安知道呢套郵票係首次採用半圓形設計,描繪咗6個春天節氣景象,未來仲會推出其餘3個季節節氣嘅郵票,等大家可以儲齊24個節氣。

另外,東京奧運明年舉行,奧運開幕日當日亦會推出「2020年東京第32屆奧林匹克運動會」郵票,1套4枚展示咗香港運動員過往曾獲獎或取得資格即將參與同競逐嘅體育項目。

不過講到吸引,黛安認為必數「李小龍武藝傳承」主題郵票啦!香港郵政高級經理(集郵推廣)李振宇噚日介紹話,呢一套6枚郵票及小型郵票以李小龍電影《唐山大兄》、《精武門》、《猛龍過江》同《死亡遊戲》,加埋佢嘅哲學思想同自創嘅「截拳道」做靈感所設計,非常有特色。黛安提提大家,呢12套精彩郵票今日起接受預訂,千祈咪錯過啦!

二十四節氣春

香港郵政高級經理(集郵推廣)李振宇認為,今次啲郵票主題吸引,相信銷情同去年相若。

撰文: 黛安 消息特靈八卦公關
欄名: 八卦名利場