【聲明】港生活網站並無進行電話推廣活動

Esther Wong
Esther Wong

集體撞鬼

發佈時間: 2019/10/22

4天前

平生不做虧心事,半夜敲門……梗係驚!自己「偶遇」不止一次,朋友D真人真事真恐怖又聽過唔少,所以好少睇鬼片或聽鬼故,無必要再自己「主動」嚇自己。但前日竟……竟……然……去海洋公園玩《哈囉喂全園祭》……人生第一次!咁大膽,皆因聽到海洋公園識飲識食部門大佬Perry講起佢哋嘅「血淋淋老鼠」壽司、當歸豬骨「孟婆湯」、「聖癲牢」靈異套餐……實在有趣,真係想試!最多約齊成班同事及好友去玩,怕咩!

拍開廣告,難免職業病!每間鬼屋雖然都驚驚地,嗌到聲已拆,但都好留意個環境布置同做法。《厲鬼邨》充滿香港特色,好似去咗港產片入面啲猛鬼屋邨咁!邪靈封印《H19-祭禮》做得幾靚幾型,瀰漫西方神秘魔幻氣氛!和合石總站的VR紅Van,明明全程嚇到WeWa大叫,卻不忘研究其影像同配音效果!最欣賞結界入口的《Hell TV-地獄巨星賀台慶》,舞台projection做得幾好,台詞寫得好笑又貼市貼地;邊睇邊提自己,記得一陣問下市場部靚姐姐阿Rose,介紹番啲製作公司認識下好喎!另外成街QR Code,手機掃掃就招魂喚鬼,C問︰「睇下Load幾耐先!」M就讚︰「效果幾OK啊!」哈哈哈幾多人好似我地咁癲?係都要Load到啲鬼魂現晒身兼合照先心息……

職業病,無藥醫。雖然玩得更仔細更認真更見到箇中心思,但若然可以「無知」少少,抽離一下本業,可能玩得更有feel更驚青!

2小時前

真正鬼域,邊會有得玩有得食有驚有喜,又可以大嗌減壓,放鬆心情?呢幾個月香港瞬間變到「鬼咁恐怖鬼咁不可思議鬼咁激動鬼咁暴力鬼咁無力」,人鬼不再殊途,人性魔性開閘大爆發。眾生都「鬼咁慘」,飽受仇恨,傷痛,憤怒、猜忌無間斷侵佔附身……!我們已經集體撞鬼,真係Bloody Hell~(本欄逢周二刊登)

撰文: Esther Wong 廣告創作人,「ManyMany More興趣小組」創辦人。
欄名: @實時生活