愈八愈開心

1個月前

教創意課，學到最多嘢的其實是我。

每星期都要年輕學生分享指定主題，看過甚麼書、聽過甚麼音樂、睇過甚麼電影、去過哪間小店、玩過甚麼app……因為我一直認為，所謂的Creativity，是一種生活方式和態度，要夠「八卦」、要親身去體驗同感受。最buy廣告大王CC Tang的3P創意心法︰Playfulness、Persistence同Passion，人生如此，更有意思！學生們分享的不單單是「資訊」，最重要的是「想法」。好或不好，鍾意或討厭，唔該講重點！個腦用多啲，才不會長期「留白」，才不會一面倒受情緒主導。

Inspire年輕人的同時，他們也在inspire我。好多新奇、新鮮嘢我也第一次認識，原來茶果嶺有間超過50年的冰室咁懷舊，趁就快清拆好快啲去幫襯下；咦，原來王馨平有首咁嘅舊歌我聽都未聽過，竟然可以影響一個年輕女學生咁多，好感動。

所以呢，雖然明明都忙忙地，但也樂意花時間備課，又要每星期撥出一整個下晝上課，因為獲益良多，根本就係益晒我。

3天前

唔教唔知朋友多，兼且一個二個都心地好！一個ＷhatsApp問到︰有無興趣來做guest speaker，同年輕人分享下經驗同睇法呀？明明大家都是大忙人，都二話不說就即刻say yes！全因心繫年輕一代，inspire幾多得幾多。A教寫生，其實是說︰「大學生要明白Self Learn的重要性……」J講電影，其實是說︰「未來無人知，最緊要做個好人，做好眼前的事，有一天自會水到渠成……」我地都曾經年輕過，大人們的說話邊記得咁多？

就當放下了一粒種子吧，在你人生日後某個時刻，或面對難關或感到迷惘或是甚麼也好，可能你會記起當年我們的某一句話，可能有所醒悟或幫助，又或只不過令你咀角揚起一個「啊！原來如此！」的會心微笑。咁已經good enough喇～

（本欄逢周二刊登）